GRAZZI MILL-QALB

Grazzi talli ġejtu tarawna fil-Comic-Con tas-26 u s-27 ta' Novembru.  Ħadna gost nitkellmu magħkom.  Dawn fostkom li jixtiequ jakkwistaw xi strixxiklu ieħor tal-Komiks tas-Sikkina li forsi għad m'għandhomx, kull m'għandhom jagħmlu hu li jibgħatu messaġġ żgħir fuq dan l-indirizz: gawgaw@linuxmail.org,  u niftehmu kif nibgħatulkom dak li għandkom bżonn bil-posta.  Minn-naħa tagħna, ħallu f'idejna biex ngħidulkom fejn se narmaw il-mejda d-darba li jmiss.  Ibqgħu żuru dan is-sit elettroniku minn żmien għal żmien, u nżommukom aġġornati bl-aħħar aħbarijiet.

Dawk li għad m'għandhomx kopja tal-istrixxiklu tal-Kranium: "Il-Qamar fil-Bir", iktbulna, u nibgħatulkom kopja.     

Qed nurukom paġna mill-istrixxiklu li jmiss fl-istorja tal-Gawgaw.  Biex tkunu tafu meta l-istrixiklu se jkun lest, tridu tistaqsu lill-Barba Kieli.  Sadattant...

X'SAR MINNHA MUNA L-GĦANIQA?

Tiftakru kif il-Gawgaw kien daħal ma' Muna fil-Palazz ta' Bedud, ġie fl-idejn mat-Tork tat-Taraġ u l-Ors tal-Gandlora, u spiċċa waqa' t-taraġ għal isfel?  Muna x'kien sar minnha?  Baqgħet taħt idejn it-Tork tat-Taraġ, li ħadha miegħu, daħħalha ġo kamra mudlama u rabatha bilqiegħda ma' siġġu.  Miskina min jaf kemm rat fuq wiċċha!  Imma issa tista' taqra l-istorja kollha fl-istrixxiklu li jmiss.  Peress li dan l-istrixxiklu hu daqsxejn skabruz, x'aktarx li se nbigħuh biss mill-idejn - jiġifieri tridu tiġu fejn inkunu aħna u teħduh minn għandna.  Serrħu raskom li aħna ngħidulkom fejn inkunu.  Sadattant, qed nurukom xi zewġ stampi mill-istrixxiklu ta' Muna:

INDOMMU
AKTAR ĦOLOQ

F'taqsima oħra li nidejna fuq in-naħa tax-xellug ta' dil-paġna, qed noħolqu kuntatt ma' partijiet oħra tal-internet biex inħajrukom titkixxfu aktar fuq l-istorja tal-komiks f'Malta.  Jekk tagħfsu fuq il-buttuna msejħa "Ħoloq" issibu aktar tagħrif dwar stejjer impinġija li xxandru f'pajjizna.  Dejjem tajjeb li tkun taf aktar fuq dawn l-affarijiet.

FILMATI MILL-youtube

Araw ftit il-filmati li tul dawn l-aħħar xhur konna tfajna fil-youtube.  Dawn issa tfajnihom f'dan is-sit ukoll.  Fittxuhom fuq in-naħa tax-xellug ta' din il-paġna.

Agħti titwila lit-taqsima
"Il-Gawgaw u l-Imlejka" u ara fejn waslet l-istorja s'issa. 
Żdiedu wkoll aktar persunaġġi
fit-taqsima "Karattri".

SĦAĦAR U EĦIRSA MALTIN

Malta aktarx li hi l-uniku pajjiz fid-dinja li l-kultura tiegħu ma tinkludix persunaġġi tal-fantasija li huma magħrufa u aċċettati bil-ferħa jew bil-biza' fil-fantasija kollettiva tal-poplu.  ĠAĦAN hu xi ftit magħruf fostna imma, minkejja kollox, spiċċa karattru daqsxejn taz-zufjett u m'għandux il-ħakma fuq moħħ in-nies li għandhom karattri ta' ġnus oħra.  Il-ĦARES ukoll spiċċa jagħmel parti mid-dinja tan-nanna Gerit u illum ftit hawn min għadu jagħti kasu.  Ħaddieħor għandu l-fairies, u l-pixies, u lil Superman, u lil Batman, u lil Father Christmas, u lil La Befana, u lil Pinokkjo, u l-Drakula, u l-Frankenstein, u aħna kuntenti nilludu ruħna li dawn il-karattri huma tagħna wkoll, meta fil-fatt m'humiex.  Kuntenti nbossu b'sorm ħaddieħor u lil tagħna nagħtuh bis-sieq.  Għax moħbija bejn il-versi tal-ilsien Malti, karattri tal-fantasija HEMM - imma ma rridux nafu bihom.  Il-Ħares hi kelma li tfisser "gwardjan/għassies" - xi ħadd li qed iħares x'imkien jew xi ħaġa (mhux veru li ġejja mill-kelma Latina Lares, imma minn għerq ta' verb Malti, bħal meta ngħidu "Alla jħarisna" jew "Alla ħares").  Mela l-Ħares hu għassies u hu differenti minn Ruħ jew Fatat; u l-istejjer tal-ħares li nafu bihom juruk li hu persunaġġ differenti minn ruħ jew fatat.  Ix-XJAFEK insemmuhom mingħajr ma jgħaddilna minn rasna x'jistgħu jkunu.  L-kelma "GĦAFRIT", dari komuni ħafna, llum qed tintnesa.  L-GĦUL diġa ntnesa, imma dari kien magħruf ħafna, kemm hu u kemm in-Nanna Għula.  Tgħid jirnexxielna naħtfu lil dawn il-karattri minn xifer l-abbiss tal-estinsjoni?  Kull bidu hu iebes.  Jgħidu li qabel ma l-aħwa Grimm qabdu l-ħrejjef li kienu jafu, u daruhom tidwira sewwa, il-ħrejjef u l-karattri tagħhom kienu ħorox, u jinbuttawk, u xi ftit ħamalli.  Illum saru industrija internazzjonali.  

Għalissa, il-Komiks tas-Sikkina huma magħmula minn żewġ sensiliet: Is-sensiela tal-Gawgaw u l-Imlejka, li se jkollha mill-anqas ħames strixxikli, (jekk mhux iżjed); u sensiela oħra bl-isem ta': l-Għid tal-Erwieħ, li tirrakkonta l-istorja tal-grupp mużikali KRANIUM.

Iż-żewġ sensiliet huma indipendenti minn xulxin, u huma mpenġija minn artisti differenti.  Il-karattri ta' ġo fihom għandhom ismijiet li jinstabu fil-vokabularju tal-ilsien Malti:  Il-Gawgaw, il-Ħajbu, il-Ħares, il-Mingħul, it-Tork tat-Taraġ, il-Ħanżira tal-Erwieħ, Ninu Xkora, eċċ.  IMMA nixtiequ nserrħulkom raskom li dawn l-istrixxikli m'humiex xi antikalja ta' Wenzu u Rożi, jew xi "folklor", jew xi tagħlim tal-istorja ta' Malta jew ta' ħrejjef missirijietna.  HEMM xi elementi tal-ħrejjef, imma dawn l-istrixxikli huma maħsuba għall-kbar (tal-anqas dawk 'il fuq minn sittax-il sena), huma friski u moderni, u anke xi ftit imqarbin.  Aqrahom biex tara.  



Dawn il-komiks jinxtraw minn għandna meta narmaw mejda f'xi attivita' bħal m'hi l-Earthgarden, jew Notte Bianca, jew il-Comic Con.  Tistgħu issibuhom wkoll mill-ħanut tal-Malta Comics and Collectibles, Nru 60, Triq San Duminku, Tas-Sliema (kantuniera ma' Triq Manwel Dimech).   Jekk tibgħatu email fuq ggatt77@hotmail.com nistgħu niftehmu kif nibgħatulkom il-komiks bil-posta.  
 
Nieħdu gost ħafna nisimgħu minn għandkom.  Ikkuntattjawna.